«Bernardo Lardi, 1936-2020, Vita e arte_Leben und Werk», messaggio di Bernard Cathomas, Coira, 19.08.2022
Grazia fitg!
18/07/2022
Da:
Bernard Cathomas
Cari Massimo e Vera
Nus essan returnads da Le Prese cun bellas impressiuns e regurdientschas. In grond grazia fitg per il gentar, per la guida en l’exposiziun da Bernard e per las decleraziuns davart Poschiavo, ses edifizis profans e sias baselgias. Plaschair avain nus er gì che ti e Vera essads vegnids en l’hotel Le Prese a solver cun nus.
La pli gronda scoperta è stada l’ovra artistica da Bernardo che ti Massimo preschentas a moda fitg cumpetenta er en la publicaziun VITA E ARTE / LEBEN UND WERK. Nus deplorain che nus n’avain fin uss betg enconuschì questa ovra e n’avain mai entupà Bernardo sco artist. Ils dessegns, las picturas e las sculpturas mussan in um creativ cun grond talent e cun l’abiltad da dar a sias ovras in cuntegn persvadent en ina furma professiunala impeccabla. Ils dessegns satirics cuntegnan ina critica che tutga l’essenza. Els mussan dapli che mo la surfatscha; els van a funs. Las picturas cumbineschan concret ed abstract, integreschan simbols ed allegorias e cun las colurs sviluppa Bernardo in linguatg pictural, ina „Bildsprache“, nunconfundibla. Ins vesa immediat: questa pictura è in Bernardo. El mussa politichers, derschaders, funcziunaris, sportis ed auters umans cun empatia, er là, nua ch’el lavura cun umor ed ironia. A nus plaschan er las sculpturas en il stil da l’ARTE POVERA fitg bain. En quellas reusseschi a Bernardo da crear ovras da gronda expressiun cun materialias diras che profileschan il cuntegn.
Tes text: Bernardo Lardi: Leben und Werk, cun annotaziuns dat ina invista cumplessiva da sia vita e sia via artistica. Ina buna basa per chapir anc meglier l’ovra da Bernardo.
Nus engrazian da cor per il simpatic inscunter.
Cun chars salids a tai ed a Vera, er da Rita,
Bernard